මුරලිගේ ‘800’ට විජේයි

    2020-10-10 11:47   |    Views : 222

By Editorial

ශ්‍රී ලංකාවෙන් බිහි වූ ලෝක ප්‍රකට ක්‍රිකට් ක්‍රීඩකයකු වූ මුත්තයියා මුරලිදරන්ගේ ජීවිත කතාව ඇසුරෙන් නිපදවෙන චිත්‍රපටයේ මුරලිගේ චරිතය රඟපෑමට ඉන්දියාවේ ජනප්‍රිය නළුවෙක් වන විජෙයි සේදුපති කැමැත්ත ඵලකර ඇතැයි ඉන්දීය මාධ්‍ය ප්‍රකාශ කරයි.

දකුණු ඉන්දීය චිත්‍රපට සමාගමක් විසින් අධික පිරිවැයක් දරා නිපදවෙන මේ චිත්‍රපටය එළැඹෙන වසරේ මුල් කාර්තුවේ දි රූගත කිරීමට නියමිත ය. මේ වන විට ලෝකයේ වැඩිම ටෙස්ට් කඩුලුලාභියා ලෙසින් කඩුලු 800ක් දවාගෙන ඉදිරියෙන් සිටින මුරලිදරන්ට උපහාරයක් ලෙසින් එම චිත්‍රපටය නම් කර ඇත්තේ ද ‘800’ ලෙසිනි. චිත්‍රපටයේ රූගත කිරිම් ශ්‍රී ලංකාව, ඉන්දියාව සහ එංගලන්තයේ දි සිදු කිරීමට නියමිත ය.

මීට පෙර මෙම චිත්‍රපටය නිපදවෙන බව ප්‍රචාරය වු අවස්ථාවේ ම විජෙයි සේදුපති, මුත්තයියා මුරලිදරන්ගේ චරිතය රඟපානු ඇතැයි පැවැසුණ ද තමිල්නාඩ් ඊලාම්වාදීන්ගේ බලවත් විරෝධය හමුවේ චිත්‍රපටයේ රූගත කිරීම් ප්‍රමාද වුණි. වරෙක විජෙයි සේදුපති ඉන්දිය සමාජ මාධ්‍යයක් වෙත කරන ලද ප්‍රකාශය ද මෙහි රූගත කිරීම් ප්‍රමාද කරන්නට හේතු විය.

“මුරලි කියන්නේ ලොව අතිදක්ෂ ක්‍රිකට් ක්‍රීඩකයෙක්. ඔහුගේ චරිතයට පණ පෙවීම ඇත්තටම ලොකු අභියෝගයක්. සුන්දර චරිතයක්. හැම දෙයකට ම මනුෂ්‍යත්වය කියන දෙය අවශ්‍යයි. මේ චිත්‍රපටයේ එකමුතුකම ගැන අවස්ථා කිහිපයකදි ම කතා කරනවා. මුරලි කියන්නේ ශ්‍රේෂ්ඨයෙක්. මේක උද්යෝගිමත් චිත්‍රපටයක් වේවි.” විජෙයි සේදුපති පවසා තිබුණි.

නමුත් තමිල්නාඩු ඊලාම්වාදීන්ගේ මතය වී ඇත්තේ මුරලි දමිළ ජාතිකයන්ට පක්ෂව කිසිදු අවස්ථාවක පෙනී සිට නැති බවයි. කෙසේ වෙතත් මේ වනවිට සියලු බලපෑම් අමතක කරමින් මේ චිත්‍රපටය නිපදවීමටරානා දග්ගුබති තීරණය කර ඇති අතර අධ්‍යක්ෂක ලෙසින් කටයුතු කරනු ලබන්නේ ශ්‍රීපති රංගස්වාමි ය.

ජනප්‍රිය නළු විජෙයි සේදුපති ගණකාධිකාරිවරයකු, චිත‍්‍රපට නිෂ්පාදකයකු මෙන්ම ගීත රචකයකු ද වෙයි.

මේ අතර 800 චිත්‍රපටය ලොව ආකර්ශනීය චිත්‍රපටයක් වනු ඇතැයි ඉන්දීය මාධ්‍ය පවසයි.මෑත කාලීනව ඉන්දීය සිනමාවේ ජනප්‍රිය පුද්ගලයන්ගේ ජීවිත කතා ඇසුරෙන් චිත්‍රපට ගණනාවක් නිර්මාණය වූ අතර ක්‍රිකට් ක්‍රීඩකයන්ගේ චරිත කතා පාදක කරගත් චිත්‍රපට කිහිපයක් ද එ අතර වේ. සචින් තෙන්ඩුල්කාර්ගේ ජිවිත කතාව ඇසුරින් නිර්මාණය කළ A Billion Dreams (2017) මහේන්ද්‍ර සිං දෝනිගේ ජිවිත කතාව ඇසුරින් නිර්මාණය කළ The Untold Story (2016) වැනි චිත්‍රපට සේම මේ දිනවල 1983 ලෝක කුසලානය ජයග්‍රහණය හා එහි නායකත්වය දැරූ කපිල් දේව්ගේ ජිවිත කතාව ඇසුරින් රූ ගැන්වෙන ‘83’ චිත්‍රපටය ද ඒ අතර වේ.

 

Share on Facebook Share on WhatsApp Share on Viber