මේ වසරේ සහ එළැඹෙන වසරේ පැවැත්වීමට නියමිතව තිබූ ප්‍රධාන ක්‍රිකට් තරගාවලි ද්විත්වයක් 2022 වසර දක්වා කල් දැමීමට ජාත්‍යන්තර ක්‍රිකට් කවුන්සිලය තීරණය කර ඇත.

ඒ අනුව ඕස්ට්‍රේලියාවේ දී පැවැත්වීමට නියමිතව තිබූ විස්සයි20 ලෝක කුසලාන ක්‍රිකට් තරගාවලිය සහ නවසිලන්තයේ දි පැවැත්විමට නියමිතව තිබු කාන්තා එක්දින ලෝක කුසලාන ක්‍රිකට් තරගාවලිය ද මෙසේ කල් දැමෙනු ඇත. ඊට අමතරව 2023 ලෝක කුසලාන එක්දින ක්‍රිකට් තරගාවලිය ද කල් දැමීමට ජාත්‍යන්තර ක්‍රිකට් කවුන්සිලය තීරණය කර ඇත.

ජාත්‍යන්තර ක්‍රිකට් කවුන්සිලය මේ තීරණය ගෙන ඇත්තේ මේ වන විට ලොව පුරා පැතිර පවතින Covid 19 වසංගත තත්ත්වය හේතුවෙනි.

2021 දී ඉන්දියාවේ පැවැත්වීමට නියමිත විස්සයි 20 ලෝක කුසලාන ක්‍රිකට් තරගාවලිය වෙනස් නොකරමින්  මේ වසරේ ඕස්ට්‍රේලියාවේ පැවැත්වීමට නියමිතව තිබූ  විස්සයි  20 ලෝක කුසලාන ක්‍රිකට් තරගාවලිය  2022 දක්වා කල් දැමීමට අන්තර්ජාතික ක්‍රිකට් සභාව ඊයේ තීරණය කළේය.

කාන්තා ක්‍රිකට් ලෝක කුසලානය තරගාවලිය එළැඹෙන 2021 පෙබරවාරි සහ මාර්තු මාසවලදී නවසීලන්තයේදී පැවැත්වීමට නියමිතව තිබුණි. නමුත් නව තීරණයත් සමග එම තරගාවලිය 2022 පෙබරවාරි සහ මාර්තු මාසවල දී නවසීලන්තයේ දී ම සංවිධානය වෙනු ඇත.

එම තරගාවලිය සඳහා එංගලන්තය, ඕස්ට්‍රේලියාව, දකුණු අප්‍රිකාව, ඉන්දියාව සහ සත්කාරක නවසීලන්තය යන රටවල් මේ වනවිට සුදුසුකම් ලබා ඇති අතර තවත් කණ්ඩායම් 3ක් තරගාවලිය වෙනුවෙන් එක්කර ගැනීමට සුදුසුකම් ලබා ගැනීමේ තරගාවලියක් ද පැවැත්විය යුතුය. Covid 19 වසංගත තත්ත්වයට පෙර මෙම තරගාවලිය 2020 ජුලි මාසයේ දී මෙරට දී පැවැත්වීමට නියමිතව තිබුණ ද එය ද දින නියමයක් නොමැතිව කල් දැමුණි.

එමෙන් ම මීට පෙර 2023 පෙබරවාරි සහ මාර්තු මාසවල දී පැවැත්වීමට යෝජිතව තිබූ 2023 ලෝක කුසලාන ක්‍රිකට් තරගාවලිය ද එම වසරේ ම ඔක්තෝබර් සහ නොවැම්බර් දක්වා කල් දැමීමට ද ජාත්‍යන්තර ක්‍රිකට් කවුන්සිලය තීරණය කර තිබේ.

@JP